आनन्दगिरिटीका (छान्दोग्य)
तृतीयोऽध्यायः: द्वितीयः खण्डः
मध्वन्तरं दर्शयति –
अथेति ।
वक्तव्यविशेषं कथयति –
यजूंषीति ।
कथं तेषां मधुकृत्त्वं तदाह –
पूर्ववदिति ।
ऋङ्मन्त्राणामृग्वेदविहिते कर्मणि प्रयुक्तानां यथा पूर्वं मधुकरत्वमुक्तं तथा यजुषामपीत्यर्थः ।
यजुर्वेदविहिते कर्मणि पुष्पदृष्टिमाचष्टे –
यजुर्वेदेति ।
ता अमृता आप इत्यस्य पूर्ववद्व्याख्यानमित्याह –
ता एवेति ॥१॥
यजुषामादित्यसम्बन्धि मधु प्रत्यक्षं दर्शयति –
एतदिति ॥२ – ३॥
इति श्रीमदानन्दगिरिटीकायां तृतीयाध्यायस्य द्वितीयः खण्डः ॥