आनन्दगिरिटीका (छान्दोग्य)
चतुर्थोऽध्यायः: षष्ठः खण्डः
अवशिष्टं पादत्रयं कथं द्रष्टव्यमिति बुभुत्समानं सत्यकामं प्रत्याह –
सोऽग्निरिति ।
अविदुषो विद्याभिमाननिमित्तकर्मत्यागो न युक्त इति मत्वाऽऽह –
सत्यकाम इति ।
अभि सायं बभूवुः सायंकालं प्राप्ता इति यावत् ।
तस्य ब्रह्मचर्यमव्यावृत्तमिति सूचयति –
तत्रेति ।
उपोपविवेश तत्रोपशब्दाभ्यां गवामग्नेश्च सामीप्ये निवेशनमस्योच्यते ।
अर्थिने विद्या वक्तव्येति सूचयति –
ऋषभेति ॥१॥
आत्मगोचरमग्नेश्चास्य विद्यमानमित्यर्थः । यद्वा पृथिव्यादिरूपेणाग्नेरवस्थानादग्निविषयमित्यर्थः । यथोक्तपादे गुणविशेषं निर्दिशति –
एष वा इति ॥३॥
द्वितीयपादोपासकस्य द्विविधं फलं दर्शयति –
स य इति ।
यथोक्तं चतुष्कलमिति यावत् । तथैवोपास्यगुणानुरोधेनेत्यर्थः । तद्गुणस्तेन गुणेन गुणवाननन्तवानविच्छिन्नसन्तानो भवतीत्यर्थः । अनन्तवतो लोकानक्षयानित्येतत् ॥४॥
इति श्रीमदानन्दगिरिटीकायां चतुर्थाध्यायस्य षष्ठः खण्डः ॥